ՀՀ վաստակավոր նկարիչ Վլադիմիր Աբրահամյան

Չէ որ երաժշտությունն էլ գույն ունի, օրինակ կապույտը երազանք է ….

                                                                                          Վլադիմիր Աբրահամյան

ՀՀ վաստակավոր նկարիչ Վ. Աբրահամյանը դասական երաժշտության սիրահար էր, նրա արվեստանոցում մշտապես հնչել է երաժշտությունը: Ստեղծագործելիս հաճախ նախ ձայնարկիչն էր միացնում: Նրա ձայներիզների հարուստ հավաքածուն այսօր էլ կա արվեստանցում, ինչպես ինքն էր դասակարգել:

1941 թվականին, ուշ աշնանային մի սիրուն օր, բնատակերներով պարուրված մի գողտրիկ գյուղում է ծնվել Վլադիմիր Աբրահամյանը, հնձվորներին հաց ու ջուր հասցնելու կես ճանապարհից մայրը հետ է դարձել … Ցորենի դաշտում էլ լույս աշխարհ է եկել:

Բջնիում ապրող աշխատավոր ամուսինների` Սմբատի ու Սիրանույշի 5-րդ զավակն էր Վոլոդյան (հետագայում` Վլադիմիր): Ընտանիքում ոչ ոք գեղանկարչության հետ առնչություն չուներ, առավել ևս` արվեստի: Հետո միայն պիտի ի հայտ գար տղայի նկարելու նկատմամբ հետաքրքրությունը, սերը, տաղանդը: Մեկ անգամ չէ, որ Վ. Աբրահամյանը նշել է` բնությունն է սովորեցրել նկարել:  Ով իմանար, որ լազուր աչքերում չխամրող մանկության պատկերները մի օր կտավներ էին դառնալու, ջերմացնելու էին մարդկանց սրտերը, զարդարելու էին թանգարանները: Հնարավոր չէ  Վ. Աբրահամյանի արվեստը տեղավորել մեկ ժանրում: Նա հավասարապես վարպետորեն ստեղծագործել է բոլոր ժանրերում: Նկարչի ներկապնակին հատուկ են վառ գույները:

Նրա մասին երկար ու ձիգ պատմություններ չեն գրվել, բայց նա զարդարել է ուրիշների պատմությունները. գրքի շապիկ, թե պատկերազարդ էջեր` ամեն գործի իրեն հատուկ գույնն ու ձևն է տվել…

Հենց նրա արվեստի մասին մարդկանց պատմելու, ժամանակակից լեզվով պատմելու նպատակով էլ ստեղծվեց ART VLadi MIR-ը: Ստեղծվել է, որ Վ. Աբրահամյանի  արվեստի միջոցով հայկական արվեստը տարածվի…

Կենսագրական տվյալներ

    /1941-2020/

1941թ․ -Ծնվել է Կոտայքի մարզի Բջնի գյուղում

1966 թ․— ավարտել է Փ․ Թերլեմեզյանի անվան գեղարվեստի պետական քոլեջը

1971թ․— ավարտել է Երևանի պետական գեղարվեստաթատերական ինստիտուտը

Աշխատել է.

1973-1976 թթ․— Երևանի պետական գեղարվեստաթատերական ինստիտուտում` դասախոս

1980-1991 թթ․— Հեռուստառադիոպետկոմի գրական — գեղարվեստական հաղորդումների խմբագրությունում` որպես բեմադրող նկարիչ

1993-1995 թթ․— Գեղարվեստական խմբագիր՝ ՆԳ «02» շաբաթաթերթում

1995-1999 թթ․— Գեղարվեստական խմբագիր՝ «Արևիկ» հրատարակչությունում

1999-2014 թթ․— Փ․ Թերլեմեզյանի անվան գեղարվեստի պետական քոլեջում`դասախոս

2015-2020 թթ.  դասավանդել է Աբովյանի պետական քոլեջում` դասախոս

1975 -2020 թթ. Հայաստանի նկարիչների միության անդամ  

 Ցուցահանդեսներ

1972 թ. -ից մասնակցել է մի շարք հանրապետական, համամիութենական և միջազգային ցուցահանդեսների.

1975 թ.- ՌԴ, Տյումեն մարզ, ք. Տյումեն

1976 թ.- ՌԴ, Բուրիաթիայի հանրապետություն, ք. Ուլան Ուդե

1979 թ.- ՌԴ, Արխանգելսկի մարզ, ք. Արխանգելսկ

1983 թ.- Շվեդիա

1983 թ.- Լեհաստան

1986 թ.- ԱՄՆ

1991թ.- Ֆրանսիա

Անհատական ցուցահանդեսներ

2005 թ․ — Չինաստան, ք. Նանչանգ

2011 թ․— Հայաստան, ք. Երևան

2017 թ. – Հայաստան, ք. Երևան /հոբելյանական/

2019 թ. –Հայաստան, ք. Երևան

Հետմահու

2021  թ.- Հայաստան՝ ք. Երևան

2023 թ. – Հայաստան՝ ք. Երևան

 Պարգևներ, մրցանակներ

2005 թ․— պարգևատրվել է ՀՀ ԱԺ նախագահի շնորհակալագրով

2009 թ․— պարգևատրվել է Երևանի քաղաքապետի պատվոգրով

2011 թ․— պարգևատրվել է ՀՀ մշակույթի նախարարի պատվոգրով

2013 թ․— արժանացել է ՀՀ վաստակավոր նկարչի կոչման 

Վ. Աբրահամյանի 1000-ից ավելի ստեղծագործությունները գտնվում են ինչպես ընտանեկան հավաքածուում, այնպես էլ Հայաստանի ազգային պատկերասրահում, տարբեր թանգարաններում, անհատական հավաքածուներում /ԱՄՆ, Ֆրանսիա, Լիբանան, Արաբական Միացյալ Էմիրություններ, Լեհաստան, Գերմանիա, Չինաստան, Ռուսաստան/: Վ. Աբրահամյանը նաև 250-ից ավելի գրքի ձևավորման հեղինակ է: